Қызметкерлердің айтуынша, жедел жәрдемдегі жұмыс физикалық әрі психологиялық тұрғыдан ауыр, алайда еңбекақы атқарылатын міндетке сай емес. Кадр тапшылығы да күшейіп, дәрігерлер жетіспеген жағдайда фельдшерлер ауыр пациенттерді басқару, диагноз қою сияқты міндеттерді өздері атқаруға мәжбүр.

Фельдшерлер айына 160–170 сағаттық нормадан тыс жұмыс істейтінін айтып, артық еңбек үшін 1,5 еселенген ақы төлеуді талап етті. Сонымен қатар, міндетті медициналық сақтандыруға ай сайын 10% жарна төлеулеріне қарамастан, жылына екі рет өтетін кәсіби тексерулердің ақылы болуы да наразылық туғызған.

Қызметкерлер жүктеменің ауырлығын ескеріп, зейнеткерлік жасты төмендетуді және 101, 102 қызметкерлеріне берілетін әлеуметтік жеңілдіктермен теңестіруді сұрайды.

Мәселе басқа өңірлерде де байқалады. Жамбыл облысының Төле би ауылында фельдшерлер нақты жалақының құжаттағы көрсеткіштен екі есе төмен екенін айтса, Теміртауда жедел жәрдем қызметкерлері автопарктің тозғанын және ең жоғары айлықтың 180 мың теңгеден аспайтынын жеткізген.

Өтініштерден кейін Денсаулық сақтау министрі Ақмарал Әлназарова жедел жәрдем қызметіндегі жүктеме мен кадр мәселесіне толық аудит жүргізуді тапсырды. Ол медицина қызметкерлерінің еркін пікір білдіруіне кедергі келтіруге жол берілмейтінін атап өтті.