2025 жылдың желтоқсанында полицияға 66 жастағы ер адам мен 64 жастағы әйел, сондай-ақ олардың балалары – 32 жастағы ұлы мен 35 жастағы қызы хабар-ошарсыз кеткені туралы хабар түскен. Туыстарының айтуынша, отбасы қарашадан бері байланысқа шықпаған. Осы дерек бойынша сотқа дейінгі тергеу басталып, жедел-тергеу тобы құрылды.

ІІМ Криминалдық полиция департаментінің бастығы Қанат Нұрмағамбетовтің мәліметінше, жүргізілген тергеу іс-шаралары барысында төрт адамның да кісі қолынан қаза тапқаны анықталды.

6 қаңтарда ерлі-зайыпты зейнеткерлердің денелері үй ауласындағы шаруашылық құрылыстан табылды. Бұдан кейін іс адам өлтіру дерегі бойынша қайта қаралып, балаларды іздестіру жалғастырылды.

Қылмыс жасады деген күдікпен 29 жастағы ер адам – отбасының бұрынғы күйеу баласы – халықаралық іздеуге берілді. Сонымен бірге ерлі-зайыптының кіші қызы да күдікті ретінде халықаралық іздеуге тіркелді. Кейін ІІМ қызметкерлері Индонезиядағы әріптестерімен бірлесіп күдіктіні қолға түсірді. Қазіргі уақытта ол Қазақстанға депортацияланып, уақытша ұстау изоляторына қамалған. Қолға түскен күдікті өзінің кінәсін мойындады.

Жедел-тергеу іс-шаралары барысында үй ауласынан хабар-ошарсыз кеткен ұл мен қыздың мәйіттері табылды. Тергеушілердің мәліметінше, қылмысқа ұзақ уақытқа созылған тұрмыстық жанжал себеп болған. Іс екі және одан да көп адамды өлтіру бабы бойынша жүргізілуде, және министрліктің ерекше бақылауында.

Қазіргі уақытта тергеу жалғасып жатыр, ал отбасының кіші қызының бұл іске қатыстылығы тексерілуде. Психикалық жағдайын анықтау үшін ол сот-психиатриялық сараптамаға жіберілген.