Маңғыстау облысында бұрынғы танысын қудалаған азаматқа қатысты қылмыстық іс қозғалды. Полиция өкілдерінің айтуынша, әйелдің «жоқ» деген жауабы ескерілмей, байланыс орнату әрекеті ұзақ уақыт бойы жалғасқан.

2026 жылдың 13 қаңтарында 1987 жылы туған Маңғыстау облысының тұрғыны полицияға арызданған. Оның айтуынша, ер адаммен қарым-қатынасы 2022 жылдың желтоқсанында басталып, 2025 жылы толық тоқтаған. Алайда содан кейін де ол әйелдің еркіне қарсы хабарласып, соңынан қалмай, аңдуын доғармаған.

Бұл факті бойынша Мұнайлы аудандық полиция бөлімінде заңсыз қудалау бабымен қылмыстық іс тіркелді. Тергеу барысында жәбірленушінің бұған дейін де бірнеше рет құқық қорғау органдарына жүгінгені анықталған.

Құзіреті орган берген мәліметке сәйкес, 2025 жылдың сәуірінде ер адам ұсақ бұзақылық үшін әкімшілік жауапкершілікке тартылып, айыппұл салынған. Ал мамыр айында отбасылық-тұрмыстық қатынастарға байланысты құқық бұзушылық үшін 15 тәулікке қамауға алынған. Қудалау әрекеттері бейнематериалдар арқылы 2025 жылдың шілдесіне дейін тіркелген.

Құқық қорғау органдары сталкинг үшін қылмыстық жауапкершілік Қазақстанда 2025 жылғы 16 шілдеден бастап енгізілгенін еске салды.

Аймақта тағы бір ұқсас жағдай тіркелген. 2026 жылдың 3 ақпанында Ақтау қаласының полициясына тағы бір әйел арызданған. Оның айтуынша, бұрынғы танысы 2024 жылдың қазан айынан бері байланыстан бас тартқанына қарамастан, қудалауын тоқтатпаған.

Ер адам әртүрлі нөмірлерден шамамен 300 рет қоңырау шалып, хабарласуға тырысқан. Сонымен қатар әйелдің үйіне, жұмыс орнына және Ақтаудағы демалыс орындарына барып, мазасын алған.

Бұл дерек бойынша да заңсыз қудалау бабымен сотқа дейінгі тергеу басталды. Тергеу кезінде күдіктіге қатысты қорғау нұсқамасы шығарылғаны және оның профилактикалық есепте тұрғаны белгілі болды. Алайда ол талаптарды бұзып, әрекетін жалғастырған.

Қорғау нұсқамасын орындамағаны үшін әкімшілік хаттама толтырылып, күдікті уақытша ұстау изоляторына қамалды. Қазіргі уақытта тергеу жалғасып жатыр.

Айта кетейік, Қылмыстық кодекстің 115-1-бабына сәйкес, заңсыз қудалау үшін 200 айлық есептік көрсеткішке дейін айыппұл, 200 сағатқа дейін қоғамдық жұмыс немесе 50 тәулікке дейін қамау жазасы көзделген. Ішкі істер органдары азаматтарды мұндай жағдайларда бірден полицияға жүгінуге шақырады.