Шымкентте танысының қолынан қаза тапқан 21 жастағы қыздың ағасы қайғылы жағдайға байланысты пікір білдірді. Марқұмның ағасы Сұлтан Серікбайдың айтуынша, күдікті ұзақ уақыт бойы қарындасын мазалап, сталкерлік әрекеттер жасаған.

Ол бұл туралы Threads әлеуметтік желісіндегі парақшасында жазды. Сұлтан Серікбай отбасына көрсетіліп жатқан қолдау үшін жұртшылыққа алғыс айтып, ендгі мақсаты - істің әділ тергеліп, күдіктінің ең қатаң жазаға тартылуы екенін атап өтті.

«Қарындасым мінезі жұмсақ, сабырлы, көп сөйлемейтін, жуас адам еді. Сол себепті де оны басынған. “Жоқ” деген сөзді қабылдамаған. Қысқасы, сталкер болды», - деп жазды ол.

Марқұмның ағасы көпшіліктен бұл істі назарда ұстап, қолдау көрсетуді сұрады. Оның айтуынша, қазіргі жағдайда отбасы мүшелері артық мәлімдеме жасаудан тартынуға мәжбүр, себебі бұл кейін сот үрдісіне кері әсер етуі мүмкін.

«Бұл оқиғаны барынша таратып, әділ шешім шығуына көмектесулеріңізді сұраймыз. Сот әділ өтеді деген үміт бар. Баршаңызға сабыр мен тыныштық тілеймін», - деді ол.

Еске сала кетейік, 11 қаңтар күні Шымкентте 21 жастағы студент қыз пышақ жарақаттарынан көз жұмған еді. Аталған дерек бойынша кісі өлтіру бабы бойынша қылмыстық іс қозғалып, жедел-тергеу шаралары жүргізіліп жатыр.

Марқұм - студент Нұрай Серікбай. Ол 11-ші қаңтар күні кешке Төлеметов пен Өтегенов көшелерінің қиылысында пышақталған. Әлеуметтік желіде тараған бейнежазбалардан қыздың қашуға тырысқаны, қарсылық көрсеткені, ал күдіктінің оны ұрып-соғып, пышақ сұққаны байқалады. Қылмыстан кейін күдікті оқиға орнынан бой тасалаған.

Нұрай ата-анасымен бірге оқиға болған жерге жақын орналасқан көпқабатты үйлердің бірінде тұрған. Отбасында екі ағасы бар, өзі үйдің кенжесі. Марқұмның денесі мәйітханадан алынып, Түркістан облысындағы Төрткөл ауылына жерлеу үшін жеткізілген.