Мәжіліс депутаты Ермұрат Бәпи ұлттық қауіпсіздікке қатысты өткір мәлімдеме жасап, мемлекеттік құпияны білетін бұрынғы жоғары лауазымды тұлғалардың шетелге шығуын заңмен шектеу мәселесін көтерді.
Депутат бұл ұсынысын эмоцияға толы, қатқыл жазбасында ашық айтты.
«Бұл не қылған сүмеңдеген жүріс?! Кезінде жеке өзі билеп-төстеп, бір шыбықпен айдаған халқы пана болмайтынын сезген сорақының қорлығы ғана ма? Әлбетте бұл тіленшектік Қазақстанға, қазаққа қарайлас қарекет емес, әдеттегідей тойымсыз жеке бастың қамы болса керек!» – деп жазды Ермұрат Бәпи.
Оның айтуынша, елдің қауіпсіздігін қамтамасыз ету үшін мемлекеттік құпияға қанық адамдардың шет елге шығуын құқықтық тұрғыда реттейтін арнайы заң қажет болуы мүмкін.
«Сондықтан елдің қауіпсіздігін қамтамасыз ету мақсатында мемлекеттік құпияны білетін тұлғаның (экс-президент болсын, министр немесе басқа да лауазымгер болсын) шет елге шығу мүмкіндігін реттейтін заң қажет шығар. Қалай ойлайсыңдар, заңгер-депутат әріптестер, біз осындай заңға бастамашылық жасай аламыз ба?» – дейді депутат.
Сонымен қатар Ермұрат Бәпи Қытай тәжірибесін мысалға келтіріп, мұндай шектеулердің халықаралық міндеттемелерге қаншалықты қайшы келуі мүмкін екенін де сұрақ етіп қойды.
«Қытайдағы сияқты шетке шығуды шектейтін заң біздің елдің халықаралық міндеттемелері мен мемлекетаралық конвенцияларға қаншалықты қайшы келуі мүмкін?» – деп жазды ол.
Депутаттың сөзінше, Мәжіліс депутаттарының өзі мемлекеттік құпияға қатысты белгілі бір талаптарға бағынады. Осы орайда ол нақты тұлғаларға алдын ала шекаралық бақылау енгізу мүмкіндігін де жоққа шығармайды.
«Ал бұған және Қожамжаров сияқты басқаларға елдің қауіпсіздік қамына орай күнібұрын шекаралық “қызыл жалауша” қоюға болмай ма? Бұл қабылдаудың саяси мазмұнын Кремль қалай қабылдайтынын қайдам, ал экс-президенттің ішіндегі “қызыл иті” елдің мемлекеттік билігі мен Қазақстан халқына сес көрсетуі деп түсінеміз бе?» – делінген жазбада.
Айта кетейік, бұған дейін Нұрсұлтан Назарбаев Ресей президенті Владимир Путинмен Кремльде кездескен болатын. Алайда екі тараптың қандай мәселелерді талқылағаны ресми түрде жарияланған жоқ.
Депутаттың бұл мәлімдемесі қоғамда үлкен резонанс тудырып, ұлттық қауіпсіздік пен экс-билік өкілдерінің жауапкершілігіне қатысты жаңа сұрақтарды күн тәртібіне шығарды.
Санаттар
DALAMEDIA admin
7
0
Бүгін, 19:01
Әлем
