Қазақстанда қоғамдық орындарда азаматтарды келісімсіз фото және видеоға түсіру тәртібін қайта қарау жөніндегі бастама кең талқылауға ұласты. Бұл ұсыныс қоғамда да, журналистер арасында да әртүрлі пікір туындатып отыр. БАҚ өкілдері жаңа нормалар журналистердің жұмысын шектеуі мүмкін екенін айтып, алаңдаушылық білдірді.
Журналистер бұл мәселе шенеуніктерді қорғау үшін көтеріліп отырғанын және бұл БАҚ жұмысына кедергі келтіруі мүмкін екенін айтты Ал, мәдениет және ақпарат министрі Аида Балаева бұл сын-пікірлерге жауап беріп, рұқсатсыз түсірілімдерге қатысты қарапайым азаматтардан шағымдардың жиілегенін атап өтті. Оның айтуынша, бастаманың негізгі мақсаты - қоғамдық ортада әр азаматтың жеке кеңістігі мен құқықтарын қорғау.
«Қоғамдық орындарда рұқсатсыз түсірілімдер, пранктер, жасырын камерамен жасалған контент көбейді. Соның салдарынан қарапайым азаматтардың құқықтары бұзылатын жағдайлар тіркеліп отыр. Ал қызметтік міндетін атқарып жүрген лауазымды тұлғаларды түсіру - қалыптасқан тәжірибе. Оған тыйым салу жоспарланып отырған жоқ», - деді министр.
Министрлік бұл мәселені талқылау үшін арнайы жұмыс тобын құрып жатыр. Оның құрамына журналистер де енеді.
Жұмыс тобының негізгі міндеттері ретінде мыналар көрсетілді:
- Қандай жағдайда еркін түсірілім жасауға болатынын нақтылау;
- Қай кезде адамның жеке келісімі талап етілетінін белгілеу;
- Қандай түсірілімнің жеке өмірге қол сұғу болып саналатынын айқындау.
Ұсынылып отырған нормалар әзірге талқылау кезеңінде. Қорытынды шешім қоғам өкілдері мен сала мамандарының ұсыныстары негізінде қабылданады.
DALAMEDIA admin
Бүгін, 19:01
Әлем