Халықаралық іздеуде жүрген қазақстандық кәсіпкер Нұрдәулет Сейсенбаев Грузияда өткен комик Александр Меркульдің стендап-шоуында көпшілік алдына шықты. Оқиға орнынан түсірілген бейнежазба әлеуметтік желілерде жылдам таралып, қоғам назарын аударды.

Көрермендермен еркін форматта өткен әңгіме кезінде ер адам өзін Нұрдәулет деп таныстырып, немен айналысатыны жөніндегі сұраққа «ештеңемен айналыспаймын» деп жауап берген. Сондай-ақ ол шетелде жүрген қазақтардың бір-біріне қолдау көрсететінін айтқанымен, бұл қолдаудың нақты сипатын ашып айтпаған.

Стендап барысында Александр Меркуль қазақстандықтан Грузияда жүру себебін сұраған. Бұған жауап ретінде Нұрдәулет Сейсенбаев Қазақстанда өзіне ұйымдасқан қылмыстық топ құру және заңсыз құмар ойын бизнесін жүргізу бойынша айып тағылғанын мәлімдеді. Оның айтуынша, кінәсі дәлелденген жағдайда 12 жылға дейін бас бостандығынан айырылуы мүмкін.

Бұл жайт қазақстандық пабликтер мен әлеуметтік желілерде кеңінен талқыланды. Халықаралық іздеуде жүрген адамның көпшілік шараларға еркін қатысып, өзіне тағылған айыптарды ашық айтуы желі қолданушыларының таңданысын тудырды.

Egov.press Telegram арнасы да бұл жағдайға назар аударып, құқық қорғау органдарының ұстанымына қатысты күмәнді пікір білдірді. Арнада жарияланған жазбада 2019 жылы Грузия экстрадициялаудан бас тартқаннан кейін Сейсенбаев ісі назардан тыс қалғандай әсер қалдыратыны айтылған.

Айта кетейік, Нұрдәулет Сейсенбаев 2019 жылдың қыркүйегінде Грузия аумағында Интерпол қызметкерлері тарапынан ұсталған болатын. Қазақстан тарапы оны экстрадициялау жөнінде сұрау жолдағанымен, Грузия соты айыптаудың негізділігін растайтын қосымша дәлелдер талап еткен. Іс материалдары қаралған соң, экстрадициялау туралы өтініш қанағаттандырылмай, күдіктіні беруден бас тартылған.