Адам ағзаларын заңсыз саудалауға қатысы бар деген күдікпен халықаралық іздеуде жүрген Украина азаматы Польша аумағында ұсталып, Қазақстанға жеткізілді. Экстрадициялау Бас прокуратура, Интерполдың Ұлттық орталық бюросы және Сыртқы істер министрлігінің бірлескен жұмысы нәтижесінде жүзеге асқан.

Тергеу дерегінше, күдікті 2017–2018 жылдары трансұлттық ұйымдасқан қылмыстық топ құрамында болып, донорлар мен реципиенттерді табумен, олардың кездесуін ұйымдастырумен және заңсыз трансплантация операцияларын құпия түрде өткізуді қамтамасыз еткен.

Қылмыстық топ Қазақстанда және шетелдерде тірі адамдардың ағзаларын сатуға қатысты кемінде 56 заңсыз мәміле жасаған. Бұл операциялар елдегі медициналық ұйымдарда жүзеге асырылған.

Қылмыс әшкереленгеннен кейін күдікті құқық қорғау органдарынан бой тасалап, бес жыл бойы халықаралық іздеуде болған. Ол биыл наурыз айында Польша шекарасынан өтпек болған сәтте ұсталып, Қазақстан тарапынан берілген сұрау негізінде экстрадицияланды.

Қазіргі уақытта ол уақытша ұстау изоляторына қамалды. Күдіктіге тағылған айыптар бойынша мүлкін тәркілеумен қатар 8 жылдан 12 жылға дейін бас бостандығынан айыру жазасы қарастырылған.

Айта кетейік, бұған дейін осы қылмыстық топтың тағы екі мүшесі Түркия мен Ресейден Қазақстанға қайтарылған.