Алматыда көз жұмған қазақстандық әйелдің мүшелері алты адамға өмір сыйлады. 1962 жылы туған әйелден алынған ағзалар Алматы қалалық орталық клиникалық ауруханасында мультиағзалық трансплантация аясында табысты көшірілді.

Дәрігерлердің мәліметінше, жүрек 1988 жылы туған науқасқа, бауыр 1982 жылы туған пациентке салынды. Оң бүйрек 1996 жылғы ер адамға берілсе, сол бүйрек 2017 жылдан бері трансплантация күтіп жүрген 1966 жылғы науқастың өмірін сақтап қалды. Сонымен қатар, донордың қасаң қабықтары (роговица) 1983 және 1956 жылы туған екі адамға көру қабілетін қайтарды.

Операцияны ҚР Денсаулық сақтау министрлігінің Республикалық трансплантация орталығы ұйымдастырып, үйлестірді. Процеске Алматыдағы жетекші клиникалар - Кардиология және ішкі аурулар институты, Сызғанов атындағы хирургия орталығы және Орталық қалалық клиникалық аурухана қатысты.

Мамандардың айтуынша, донордың жасы - кедергі емес, бастысы - адам өмірін сақтап қалу. Республикалық орталық донордың туыстарына олардың батыл шешімі үшін және операцияға қатысқан дәрігерлердің кәсіби еңбегі үшін ризашылық білдірді.

Айта кетсек, бұған дейін Қазақстанда ағза трансплантациясы процесін жеңілдету туралы заңнамалық түзетулер Мәжілісте таныстырылған болатын.