Қостанайлық 22 жастағы қыз Астанадағы жеке клиникада мұрын пердесін түзету отасынан кейін алты айдан бері кома жағдайында жатыр. Бұл оқиға қоғамда үлкен резонанс тудырып, Денсаулық сақтау министрлігі арнайы тексеріс бастағанын хабарлады.
Қыз сәуір айының соңында риносептопластика (мұрын пердесін түзету және пішінін қалпына келтіру) отасын жоспарлы түрде жасатқан. Отаға бес жылдық тәжірибесі бар пластикалық хирург пен 24 жыл еңбек өтілі бар анестезиолог қатысқан. Алайда отадан кейін науқастың жағдайы күрт нашарлап, оны ауыр халде Ұлттық шұғыл медицинаны үйлестіру орталығына жеткізген.
«Алғашқы екі ай қыз жансақтау бөлімінде жатты, кейін жалпы палатаға ауыстырылды. Қазір оңалту орталығында ем қабылдап жатыр, бірақ жағдайы әлі де ауыр», - дейді туыстары.
Олардың айтуынша, клиника өкілдері отаның салдарын жасыруға тырысып, “полицияға шағымданбасаңыздар, емдеуді өзіміз төлейміз” деген ұсыныс жасаған. Алайда отбасы мұндай мәміледен бас тартқан.
Денсаулық сақтау министрлігінің Медициналық және фармацевтикалық бақылау комитеті бұл факті бойынша тәуелсіз сараптама комиссиясы құрылғанын мәлімдеді.
Министрлік дерегінше, аталған клиниканың жарамды лицензиясы бар және ол пациенттің еміне қаржылай көмек көрсетіп отыр.
Ал зардап шегушінің туыстары оқиғаның барлық мән-жайын анықтау үшін толық әрі әділ тергеу жүргізуді талап етуде.
DALAMEDIA admin
5
0