Астанада 31 жастағы әйел әріптестерін алдап, жалған оқиға ойлап тапқаны үшін қылмыстық жауапкершілікке тартылды. Ол баласы терезеден құлап, ауыр халде жатыр деп айтып, қызметтестерінен “ем-домға” деп ақша жинаған.

ІІМ мәліметінше, күдікті әйел декреттік демалыста болған кезінде басшысына хабарласып, “балам терезеден құлап, жансақтау бөлімінде жатыр” деп өтірік хабар берген. Қайғыға сенген әріптестері анаға көмектеспек болып, жиналып, картаға қаржы аударған.

Бірақ көп ұзамай шындық әшкере болды: әріптестердің бірі әйелдің күйеуіне хабарласып, баланың жағдайын сұрағанда, ер адам “бәрі жақсы, ешқандай оқиға болған жоқ” деп жауап берген.

Тергеу барысында жиналған ақшаның демалыс пен жеке қажеттіліктерге жұмсалғаны анықталды — әйел Түркияға демалуға кеткен.

«Жәбірленушілер алданғанын түсініп, полицияға жүгінген. Тәртіп сақшылары дереу тексеру жүргізіп, әйелді алаяқтық бабы бойынша жауапқа тартты», — деп хабарлады Ішкі істер министрлігі.

ІІМ азаматтарға осындай жағдайларда эмоцияға берілмей, ақпараттың анықтығын тексеруге кеңес береді. Өйткені өзгенің сенімі мен жанашырлығын пайдалану — заңмен қудаланатын іс.