Абай облысының Бестерек ауылында тамыз айындағы жол апатынан кейін бір ай бойы комада жатқан 9 жастағы Айзере Дәулет қайтыс болды. Бұл туралы облыстық денсаулық сақтау басқармасы хабарлады. Ведомствоның мәліметінше, қыз бала 26 қыркүйекте көз жұмған, ал жерлеу рәсімі 29 қыркүйекте өткен. Ата-анасының өтініші бойынша өзге деректер жарияланбайды.

Еске салайық, жантүршігерлік жол апаты 19 тамыз күні болған еді. Toyota маркалы автокөліктің жүргізушісі үй қақпасының маңында ойнап жүрген балаларды қағып кеткен. Оқиға орны жолдан небәрі он метр жерде орналасқан.
Апат салдарынан үш бала оқиға орнында қаза тапты, тағы үшеуі ауыр жарақат алған. Олардың барлығы екі мен тоғыз жас аралығындағы балалар еді.

Трагедиядан кейін президент Қасым-Жомарт Тоқаевтың тапсырмасымен екі бала санитарлық авиациямен Астанаға жеткізілген болатын. Солардың бірі - алты жасар ұл, біртіндеп сауығып шықты, ал тоғыз жасар Айзере бірнеше апта бойы жансақтау бөлімінде ес-түссіз жатқан еді. Өкінішке қарай, дәрігерлердің барлық әрекетіне қарамастан, қыз бала есін жимастан көз жұмды.

Полиция мәліметінше, көлік жүргізушісі - 55 жастағы ер адам оқиға кезінде мас болмаған. Алайда кейін оның медициналық көрсеткіштерге байланысты жүргізуші куәлігі болмауы тиіс екені анықталған. Күдікті қамауға алынып, қылмыстық іс қозғалды.