Маңғыстау облысында жолаушылар мінген шағын автобус жол апатына ұшырап, салдарынан 10 адам көз жұмды. Тағы үш адам әртүрлі жарақатпен ауруханаға жеткізілді. Белгілі болғандай барлық жолаушылар Бекет-Атаға қажылық сапарына шыққан.

ҚР Ішкі істер министрлігінің ресми өкілі Шыңғыс Алекешевтің хабарлауынша, қайғылы оқиғадан кейін министрлік жанынан тәулік бойы жұмыс істейтін жедел штаб құрылды. Тергеу амалдары ІІМ басшысы Ержан Сәденовтің жеке бақылауына алынды. Қазір тергеу барысында жүргізушінің әрекеті, көліктің техникалық жағдайы, бағыт пен тасымалдау шарттары зерттеліп жатыр.

Айта кетейік, апат 11 қыркүйекте Қарақия ауданына қарасты Сенек ауылынан шамамен 90 шақырым жерде болды. Алдын ала мәлімет бойынша, жолаушыларға лық толы Toyota Hiace шағын автобусының жүргізушісі рөлге ие бола алмай, көлік жол жиегіне шығып кетіп, аударылған.