Ауғанстанда жойқын жер сілкінісінен кейін құтқару жұмыстары жалғасуда. Соңғы деректерге сәйкес, 1 400-ден астам адам қаза тауып, 3 мыңнан астам тұрғын жарақат алған. Табиғи апат салдарынан 8 мыңға жуық үй қирап қалған. Ең көп шығын Кунар провинциясында тіркелген - мұнда тұтас ауылдар жермен-жексен болды.

Жергілікті ауруханалар зардап шеккендерге лық толы. Дәрігерлер шатыр, дәрі-дәрмек пен азық-түлік жетпейтінін айтып, жедел көмек сұрап отыр. 

Ұлыбритания, Қытай, Үндістан, Швейцария және БҰҰ көмек көрсетуге дайын екендіктерін мәлімдеді. Алайда құтқарушылардың айтуынша, әзірге көмек тек сөз жүзінде айтылыпты. Кейбір елдер қаржылай көмектің «Талибан» қолына өтіп кетуінен қауіптенуде.

Айта кетейік, қыркүйектің 1-іне қараған түні елдің шығысында магнитудасы 6 баллға жеткен жер сілкінісі тіркелген. Кеше Джелалабад қаласының маңында тағы да 5,2 балдық жер асты дүмпулері сезілген.