Қасым-Жомарт Тоқаев Түрікменстанға ресми сапармен барды. Мемлекет басшысы Халықаралық бейбітшілік және сенім жылына арналған форумға қатысу үшін Ашхабад қаласына табан тіреді.

Қазақстан Президенті Қасым-Жомарт Тоқаев Түрікменстанда өткен бейтараптықтың 30 жылдығына арналған халықаралық форумға қатысты. Жиында әлемдегі тұрақсыздық, сенім дағдарысы және бейбітшілік мәселелері талқыланды.

Тоқаев түрікмен халқын мерейлі датамен құттықтап, Түрікменстанның бейтарап саясаты Еуразиядағы тұрақтылыққа үлес қосып отырғанын айтты. Ол Махтумқұлы Пырағының «Тыныштық болса ел өседі, әділдік болса сенім күшейеді» деген сөзі бүгінгі халықаралық жағдайға дәл келетінін атап өтті.

Президент БҰҰ-ны реформалау қажеттігін көтеріп, Қауіпсіздік Кеңесінің құрамын кеңейту мәселесін қолдайтынын жеткізді. Сондай-ақ әлемдік қақтығыстарды тоқтату үшін ірі державалар арасында ашық диалог керек екенін айтты.

Сондай-ақ, Тоқаев Украинадағы келіссөз үрдісінің жандануына Қазақстан қолдау көрсететінін, Таяу Шығыстағы бейбіт келісімдерді оң бағалайтынын және Әзербайжан мен Армения арасындағы декларацияны тарихи қадам деп санайтынын мәлімдеді.

Сонымен бірге, форум аясында мемлекет басшысы аймақтағы су тапшылығы, экология, көлік дәліздері, Арал мен Каспий мәселесі сияқты ортақ түйткілдерді бірге шешу қажет екенін ерекше атап өтті. Сондай-ақ ол Қазақстан атынан жаһандық су ұйымын құру бастамасын көтерді.

Айта кетейік, Ашғабаттағы жиынға Түркия, Ресей, Иран, Қырғызстан, Өзбекстан және өзге де елдердің басшылары қатысты. Жалпы фотосессияда Тоқаев Садыр Жапаров пен Режеп Тайип Ердоғанның ортасында тұрып, суретке түсті.