Қазақстандық әлемдік деңгейдегі әнші Димаш Құдайберген БҰҰ-ның Халықаралық көші-қон ұйымының (ХКҰ) жаһандық ізгілік елшісі болып тағайындалды. Бұл туралы жаңалық 8 желтоқсанда Женевада өткен ХКҰ кеңесінің жыл сайынғы сессиясында жарияланды.
Биыл ол ХКҰ-мен жұмысын кеңейтіп, Рамазан айындағы қайырымдылық акцияларын қолдап, адам саудасына қарсы бастамаларға атсалысты. Сондай-ақ әлемдік Stranger туры аясында Нью-Йорк, Мехико, Барселона, Лондон және Берлин қалаларында инклюзивтілік пен бірлік жөніндегі ойларын жеткізіп, ұйым миссиясының танылуына үлес қосты.
Женевада өткен кеңес барысында Димаш БҰҰ-ға мүше мемлекеттер өкілдерінің алдында S.O.S d’un terrien en détresse композициясын орындады. Ал ХКҰ бас директоры Эми Поуп өнерпаздың гуманитарлық бастамаларға қосқан үлесін ерекше атап өтіп:
«Димаш өз дауысын өнер үшін ғана емес, қоғамда назардан тыс қалатын жандардың даусын жеткізу үшін пайдаланып келеді», – деді.
Тағайындау рәсімінде Димаш Құдайберген сөз сөйлеп, мигранттардың құқықтарын қорғауға әрі қолдауға дайын екенін жеткізді:
«Бұл мәртебені үлкен кішіпейілділікпен және зор жауапкершілікпен қабылдаймын. Жаһандық ізгі ниет елшісі ретінде мен миграциядағы адамдардың құқықтарын қорғауды, қауіпсіз көші-қон жайлы хабардарлықты арттыруды жалғастырамын. Сондай-ақ инклюзивтілік пен тұрақтылық қағидаттарын ілгерілетіп, төтенше жағдайлар кезінде қаражат жинау және көмек көрсету бойынша бастамаларды қолдай беремін», – деді ол.
Әртіс жаңа рөлінде қандай бағыттармен айналысатынын да атап өтті:
«Бұл миссия арқылы мен қауіпсіз көші-қонды қолдағым келеді, мейірімділік пен қамқорлықты насихаттап, бүкіл қоғамды бірлікке шақырғым келеді. Әрбір жүрек – бізді біріктіретін жарық, сол жарық арқылы біз бірлесіп ортақ әлем қалыптастырамыз», – деді әнші.
Димаш гуманитарлық бастамаларды қолдағаны үшін тыңдармандарына алғыс білдірді.
Санаттар
DALAMEDIA admin
