DALAMEDIA admin
Астанада «Шабыт» халықаралық шығармашылық фестивалінің финалы басталды
Астанада XXVIII «Шабыт» халықаралық шығармашылық жастар фестивалінің финалдық кезеңі ресми түрде ашылды. 18 қараша күні қатысушылардың сахнаға шығу реті анықталған жеребе тарту рәсімі өтті. Бұл — байқаудың шешуші кезеңіне бастау беретін маңызды сәт.
«Шабыт» фестивалі 30 жылға жуық уақыт бойы түрлі елден жиналған талантты жастарды біріктіріп келеді. Биыл байқауға қатысушылар саны ғана емес, қазылар алқасының ауқымы да кеңейді. Қазылар құрамына Қытай, Ресей, Түркия, Италия, Қырғызстан және Өзбекстаннан танымал өнер қайраткерлері шақырылған.
Астана қаласы әкімінің орынбасары Есет Байкен ашылу рәсімінде фестивальдің қала өміріндегі маңызына тоқталды:
«Әлемге талай жас дарынды танытқан «Шабыт» биыл 28-рет өтуде. Үзілістен кейін қайта жалғасқан фестиваль өз деңгейін сақтап, елордадағы шығармашылық ортаға серпін беріп отыр»,— деді ол.
Биылғы фестивальге Қазақстанның барлық өңірінен және шетелдерден 800-ден астам өтінім түскен. Бұл — жастар арасында байқауға деген қызығушылықтың артқанын көрсетеді. Ұйымдастырушылардың айтуынша, кәсіби қазылар алқасы қатысушыларға әділ баға беруді қамтамасыз етеді.
Фестиваль жеңімпаздары мен Гран-при иегері 22 қараша күні Қазақ ұлттық өнер университетінде («Шабыт» ғимаратында) өтетін салтанатты марапаттау рәсімінде жарияланады.
Ұйымдастырушылар:
• ҚР Мәдениет және ақпарат министрлігі
• Астана қаласы әкімдігі
• «Мәдени іс-шараларды өткізу дирекциясы» ШЖҚ ГККП
• Күләш Байсейітова атындағы Қазақ ұлттық өнер университеті
Толық ақпарат: shabyt2025.kz
26
0
Пікірлер
