Қазақстан Президенті Қасым-Жомарт Тоқаев АҚШ-қа ресми сапармен келді. Бұл туралы Ақорда баспасөз қызметі хабарлады.

Мемлекет басшысын Вашингтон әуежайында АҚШ Мемлекеттік хатшысының бірінші орынбасары Кристофер Ландау қарсы алды.

Сапар барысында Қасым-Жомарт Тоқаев АҚШ Президенті Дональд Трамппен келіссөздер өткізеді, сондай-ақ «Орталық Азия - АҚШ» (C5+1) форматындағы саммитке қатысады.

C5+1 - 2015 жылы құрылған өңірлік диалог алаңы. Оның құрамына Қазақстан, Қырғызстан, Тәжікстан, Түрікменстан, Өзбекстан және АҚШ кіреді. Платформа экономикалық серіктестік, қауіпсіздік, экология және тұрақты даму мәселелеріне бағытталған. Саммиттер әрбір 1–2 жыл сайын өтеді және өңір елдерінің басшылары мен министрлері деңгейінде ұйымдастырылады.

Бұған дейін елімізге АҚШ Президентінің Оңтүстік және Орталық Азия істері жөніндегі арнайы өкілі Серджио Гор мен Мемлекеттік хатшының орынбасары Кристофер Ландау келген болатын. Олар Алматы мен Астанада кездесулер өткізіп, екі ел арасындағы кеңейтілген стратегиялық серіктестікті дамыту және алдағы Вашингтон саммитіне дайындық мәселелерін талқылаған еді.