«Қазпоштаның» хабарлауынша, Қазақстаннан АҚШ-қа ішінде тауар бар сәлемдемелерді жіберу уақытша мүмкін болмай отыр.

Бұл шешімді АҚШ-тың Кеден және шекара қызметі 26 тамызда қабылдаған. Шектеу тек Қазақстанға ғана емес, әлем елдерінің басым бөлігіне қатысты. Қазір Дүниежүзілік пошта одағына мүше 192 мемлекеттің ішінде тек бесеуі ғана тауарлық сәлемдеме жібере алады.

Ал жеке хаттар мен құжаттар бұрынғыдай қабылданып, жеткізіледі.

«Қазпошта» өкілдері халықаралық әріптестермен келіссөздер жүргізіп жатқанын және қызметті жақын уақытта қалпына келтіруге күш салатынын мәлімдеді.