Өскемен қаласының прокуроры Тимур Чакпантаев уақытша қызметінен шеттетілді. Бұл туралы ШҚО прокуратурасы хабарлады. Қазір оған қатысты қызметтік тексеріс жүргізіліп жатыр.

Оқиғаға әлеуметтік желіде тараған ақпарат себеп болған. Белгілі болғандай, тамыздың 31-інен қыркүйектің 1-іне қараған түні прокурор қызметкерлерін түнгі екіде “дабылмен” жинаған. Қызметкерлер төтенше жағдай болды деп ойлаған, алайда дабылдың жалған екені анықталған.

Кейін басшылық кабинетінде Чакпантаев пен екі прокурор арасында жанжал шығып, соңы қол жұмсауға ұласқан деген дерек бар. Жәбірленушілер полицияға шағым түсірген.

ШҚО прокуратурасы бұл факті бойынша тексеріс жүріп жатқанын, соңғы шешім тек тергеуден кейін қабылданатынын мәлімдеді. Ал полиция әзірге қылмыстық іс қозғалғанын ресми растаған жоқ.