Қазақстан президентінің баспасөз хатшысы Руслан Желдібай Telegram-арнасында Қасым-Жомарт Тоқаевтың АҚШ президенті Дональд Трамппен Нью-Йоркте өткен кездесуден фотосуреттерін жариялады.

Бір суретте қос мемлекет басшысы қатар түссе, екіншісінде олардың жанында АҚШ-тың бірінші ханымы Мелания Трамп та бар.

Тоқаевтың АҚШ-қа сапары БҰҰ Бас Ассамблеясының 80-ші мерейтойлық сессиясына орайластырылған. Қазақстан басшысы жалпы пікірталаста сөз сөйлеп, бірқатар маңызды келіссөздер жүргізді. Атап айтқанда:

• Дональд Трамппен кездесу қорытындысында жаңа вагондар сатып алу туралы құны 4,2 млрд долларлық келісімге қол қойылды;

• Amazon компаниясының аға вице-президенті Дэвид Запольскиймен жүздесіп, ол Қазақстанда жоғары жылдамдықты интернетті дамытуға қолдау білдіруге уәде етті;

• Украина президенті Владимир Зеленскиймен, БҰҰ бас хатшысымен және ФИФА президенті Джанни Инфантиномен кездесті.

Желдібайдың айтуынша, жарияланған фотолар – мемлекет басшысының ресми сапар хроникасының бір бөлігі.