Қазақстан Президентінің көмекшісі әрі баспасөз хатшысы Руслан Желдібай соңғы күндері Үкімет пен Мемлекет басшысы Әкімшілігіндегі кадрлық өзгерістерге байланысты пікір білдірді. Оның айтуынша, бұл – жоспарлы ротация, негізгі мақсат – стратегиялық бағыттарда жұмыстың тиімділігін арттыру.

• Мұрат Нұртілеу – бұрынғы Сыртқы істер министрі енді Президенттің көмекшісі қызметін атқарады. Ол инвестиция тарту ісіне жетекшілік етіп, шетелдік мемлекет басшылары және ірі компаниялармен тікелей байланыс орнатпақ.

• Жаслан Мадиев – Премьер-министрдің орынбасары әрі Жасанды интеллект және цифрлық даму министрі болып тағайындалды. Оның міндеті – Қазақстанды толыққанды цифрлық мемлекетке айналдыруға серпін беру.

• Жұлдыз Сүлейменова – бұрын Amanat партиясынан Мәжіліс депутаты болған. Енді ол Оқу-ағарту министрі қызметін атқарады. Қоғамдық қызметі мен білім беру саласындағы тәжірибесімен танымал.

Еске салсақ, өткен аптада Президент бірнеше көмекшісін, соның ішінде Тамара Дүйсенованы, Ернар Баспаев пен Ержан Қазыханды қызметінен босатқан еді. Ал Сыртқы істер министрі болып Ермек Қошербаев тағайындалды. Сондай-ақ, бұрынғы министр Ғани Бейсембаев Оқу-ағарту министрлігінен кеткен болатын.