Полицияның мәліметінше, күдіктілердің үйлерінде және бір кәсіпорынның кеңсесінде жүргізілген тінту барысында 400 тоннаға жуық мұнай өнімі, сондай-ақ атыс және газ қаруы, заңсыз операцияларды дәлелдейтін қаржылық құжаттар тәркіленді.

Ведомство өкілдері қазір басқа қылмыстық іс аясында шетелге жанармайды контрабандалық жолмен шығаруға қатысы бар компанияның қызметі тексеріліп жатқанын хабарлады. Алдын ала деректер бойынша, кәсіпорын 30 мың тоннадан астам отынды, шамамен 8 млрд теңге көлеміндегі өнімді заңсыз экспорттаған.

Полицияның айтуынша, өткен қазан айында шекара маңындағы теміржол бекетінде осы компанияға тиесілі төрт вагон ұсталған. Олар көршілес елге 300 тонна жанармайды жөнелтпек болған.

Барлық дерек бойынша сотқа дейінгі тергеу басталды, бірқатар сараптамалар тағайындалған. Тергеу мүддесіне байланысты өзге мәліметтер жария етілмейді.

Бұған дейін құқық қорғау органдары Біріккен Араб Әмірліктерінен Қазақстан азаматын экстрадициялаған еді. Ол 2022–2023 жылдары Ақтөбе облысында топ құрамында алдын ала сөз байласу арқылы мұнайды заңсыз сатумен айналысқан деп күдіктелуде. Тергеу дерегіне сай, келтірілген шығын 300 млн теңгеден асады.