Алғашында іс адам жоғалу дерегі ретінде тіркелген. Алайда кейін жиналған айғақтар арқылы оқиғаның адам ұрлау, сосын қасақана кісі өлтіру фактісі екенін дәлелденді.

Тергеу материалдарына қарағанда, сол түні Янаның үйінің маңына ақ түсті көлік келіп тоқтаған. Рөлде - Ризуан Хайржанов есімді азамат отырған. Көлікке отырған қыз бірнеше минуттан кейін сыртқа шығуға әрекеттенгенімен, оны салонда болған Алтынбек Қатимов жібермегені бейнежазбада анық жазылған. Тергеу нұсқасы бойынша, дәл осы көліктің ішінде Хайржанов Янаны тұншықтырып өлтіргені анықталды. Кейін ол және Қатимов мәйітті қаланың сыртына апарып, өзенге тастаған.

Полиция қызметкерлері күдіктілердің айғақтарды жоюға тырысқанын да анықтады.

«Күдікті ұсталғанға дейін екі күн өтті. Сол уақыт ішінде екінші күдікті өз үйіне қайтып үлгерсе, алғашқысы көлікті жуу орталығына апарып, салонда қалған айғақтардың барлығын кетірген. Жәбірленушінің телефоны да әдейі жойылған», – деді облыстық ПД тергеу басқармасының аға тергеушісі Темірхан Хажмұратов.

Тергеу мәліметіне сүйенсек, марқұм мен күдіктілердің бірі 2022 жылдан бері таныс болған. Екеуі бірге оқыған әрі қыз-жігіт ретінде араласқан екен. Яна күдіктінің басқа қызға үйленгелі жатқанын біліп, шындықты қалыңдығына айтуға ниеттенген. Тергеушілердің пайымынша, дәл осы жайт – қылмыстың негізгі мотиві болып отыр. 

Күдіктілер хат алмасуларын өшіруге тырысқанымен, қалпына келтірілген жазбалар әрекеттің алдын ала жоспарланғанын дәлелдеп берген.

«Тәжірибемде алғаш рет осындай жағдай болды: алдымен күдікті ұсталып, кейін мүрде табылды. Оқиға аса қатыгездікпен жасалған. Қызын жоғалтқан анаға жұбату айту мүмкін емес, бірақ күдіктілердің бәрін заң алдында жауапқа тарту – біздің міндет», – деді Криминалдық полиция басқармасының бөлім бастығы Ерлан Құсайынов.

Сот Ризуан Хайржанов пен Алтынбек Қатимовты алдын ала сөз байласып, топ болып кісі өлтіру және бөтен мүлікті жою қылмыстарын жасағаны үшін кінәлі деп танып, өмір бойына бас бостандығынан айыру туралы шешім қабылдады. Сот үкімі айыпталушылардың хат алмасулары, куәгерлердің көрсетулері мен сараптама қорытындылары сияқты дәлелдерге негізделген.