Шымкент әкімі Ғабит Сыздықбеков бұрынғы орынбасары Руслан Берденовке жасалған қастандық ісі бойынша айтылған айыптауларға алғаш рет жауап берді. Бұл туралы ол Астанада өткен брифингте мәлімдеді.
Айыпталушы Ернар Жиембай сотта Берденов өзінен шенеунікті «тапсырыс беруші» ретінде көрсетуін талап еткенін айтқан болатын. БАҚ бұл жерде сөз болып отырған адамның Сыздықбеков екенін жазған.
Әкім бұл айыптауларды жоққа шығарып, өзін бұл іске байланыстыруды «негізсіз» деп атады.
«Әр адам өз ойына құқылы. Өздерін қорғау үшін айтқан сөздері шығар. Маған оның қандай қатысы бар? Сот шешім шығарды, іс аяқталды. Оны қайта-қайта қозғаудың қажеті жоқ», – деді Сыздықбеков.
Сондай-ақ ол Берденов қызметтен өз еркімен кеткенін айтты.
Еске салайық, 2025 жылғы 20 тамызда Ернар Жиембай 9 жылға сотталды. Ол жәбірленушінің пайдасына 30 АЕК, яғни 117 960 теңге өтеуге міндеттелді.
DALAMEDIA admin
5
0