Қазақстандық блогер әрі актриса Анель Аманғалиева күйеуінен ұзақ уақыт бойы қысым көріп, қоқан-лоқыға ұшырағанын айтып, көпшілікке үндеу жасады. Оның сөзінше, заң жүзінде әлі ажыраса алмаған жұбайы ажырасу үрдісіне кедергі келтіруде екен.

Актриса әлеуметтік желідегі жазбасында некелері тіркелгеннен кейін, 2024 жылдың соңында күйеуі тарапынан психологиялық қысым күшейгенін жеткізді. Ол өзін қорлағанын, манипуляция жасап, қорқытып-үркіткенін, тіпті интимдік фото-видеолар арқылы бопсалағанын атап өтті. Сонымен қатар ер адам жалған парақшалар ашып, оның таныстары мен клиенттеріне хат жазғанын да алға тартты.

Анельдің айтуынша, ерлі-зайыпты бірге тұрмаған. Ол күйеуінің компаниясында жұмыс істеп, табыс көзінен айырылып қалудан қауіптенгендіктен, ұзақ уақыт байланысын толық үзбегенін жеткізді.

Блогер бірнеше мәрте физикалық зорлық-зомбылыққа да тап болғанын мәлімдеді. Оның сөзінше, былтыр маусымда Гүржістанға сапар кезінде күйеуі ұрып-соғып, мұрнын сындырған. Жедел жәрдем шақыруға мүмкіндік бермей, медициналық көмек тек Қазақстанға оралған соң көрсетілген. Дәрігерлер бас және мойын жарақаттарын, мұрын сүйегінің сынғанын тіркеген.

Тағы бір жанжал Алматыда, кейін Ташкент әуежайында болған. Актрисаның айтуынша, ер адам оның телефоны мен жеке заттарын тартып алып, қоқан-лоқы жасаған.

Анель жұмыстан шығып, жеке кәсібін бастағаннан кейін күйеуінің әрекеті тіпті агрессивті сипат алғанын айтады. Оның сөзінше, ер адам 8 жастағы ұлы туралы қорқытып сөйлеген.

“Бұл жағдайды ашық айтуға мәжбүрмін. Енді үнсіз қала алмаймын, өз өмірім мен қауіпсіздігім үшін алаңдаймын”, – деп жазды актриса.

Сондай-ақ Анель М.Б есімді азаматтың ірі IT-компанияларда басшылық қызметтер атқаратынын және мемлекеттік құрылымдармен бірлескен жобаларға қатысуы мүмкін екенін атап өтті.