Ақтөбе қаласына жақын орналасқан демалыс базасындағы сырғанақта 8 жастағы қыз бала бұғанасын сындырып алды. Қыз сырғанап жүргенде басқа баламен соқтығысып қалған. Зардап шеккен баланың отбасы қауіпсіздік талаптары сақталмағанын айтып, демалыс базасының әкімшілігін кінәлап отыр.

Жәбірленуші қыз әжесімен бірге сырғанақтан түскен. Алайда олар сырғанақ соңында орнынан тұрып үлгермей жатып, артынан тағы бір бала келіп қағып кеткен. Осыдан соң қыз жарақат алған. Баланың анасы оқиғадан соң әлеуметтік желіде видеоүндеу жариялап, демалыс базасы қызметкерлерінің әрекетіне наразылық білдірді.

Қыздың анасының айтуынша, әкімшілік өкілдері кешірім сұрап, көмек көрсетудің орнына, баланы дұрыс қадағаламадың деп өзін кінәлаған.

«Қауіпсіздік техникасы сақталмады, демалушылар легі дұрыс реттелмеген. Қызым әжесімен бірге сырғанап, орнынан тұрып жатқанда басқа тюбинг соғып, бұғанасы сынды. Керісінше, өзімізді кінәлады», – дейді ол.

Дәрігерлер баланың бұғана сүйегі сынғанын растады. Алайда ота қажет емес, қыз амбулаториялық ем алуға жіберілген. Мамандардың айтуынша, уақыт өте келе сүйек өздігінен бітіп кетеді.

Демалыс базасының әкімшілігі бұл жағдай туралы бірден хабардар болмағанын алға тартады. Олардың мәлімдеуінше, оқиға күні ешкім тікелей шағым айтпаған, тек кешкі уақытта WhatsApp арқылы хабарласқан. Басшылық сырғанақта нұсқаушылар бар екенін, алайда демалушылардың ережені жиі сақтай бермейтінін айтады.

«Бізге сол күні ешкім жеке келіп шағымданған жоқ. Кейін мессенджер арқылы жазды. Камера жазбаларын қарап, нұсқаушылармен сөйлесемін. Жағдайды толық анықтаймыз», – деді демалыс базасының басқарушысы Инара Токсанбаева.

Айта кетейік, бұл демалыс базасында бұған дейін де даулы оқиғалар болған. Үш жыл бұрын мұнда қар көлігінің қатысуымен болған жол-көлік оқиғасынан үш баланың анасы қаза тауып, тағы бірнеше адам жарақат алған. Ол іс кейін жазатайым жағдай ретінде жабылған.

Бұл жолғы оқиғаға қатысты Ақтөбе қалалық полиция басқармасы қылмыстық іс қозғады.

«Дене жарақатын алу дерегі бойынша Қылмыстық кодекстің 306-бабы — қауіпсіздік талаптарына сай келмейтін қызмет көрсету бойынша сотқа дейінгі тергеп-тексеру басталды», – деді №3 полиция бөлімінің бастығы Мирболат Масабаев.

Қазіргі таңда істің барлық мән-жайын тергеу анықтап жатыр.