Өскеменде бес қабатты тұрғын үйдің кіреберіс есігінен тоқ соғып, бір азамат ауыр хәлде ауруханаға жеткізілді. Оқиға 25 желтоқсан күні Протозанов көшесіндегі №31 үйде болған.

Тұрғындардың айтуынша, аталған үйдің кіреберісіндегі домофон бір айға жуық уақыт бойы адамдарды тоқ соққан. Алайда бұл мәселеге дер кезінде шара қолданылмаған. Соның салдарынан үй тұрғындарының бірі қатты тоқ соғып, бірнеше метрге ұшып кеткен.

Куәгерлер жедел жәрдем шақырып, келген дәрігерлер реанимациялық шаралар жүргізген. Белгілі болғандай, зардап шеккен жігіттің жүрегі тоқтап қалған. Ол кейін жансақтау бөліміне жатқызылған. Қазіргі таңда оның жағдайы туралы нақты ақпарат берілмей отыр.

Өскемен қаласының әкімдігі оқиғадан хабардар екенін мәлімдеді. Электр тогының шығу себебін анықтау үшін оқиға орнына «Исток» ПИК қызметкерлері шақырылған.

Қала әкімдігінің мәліметінше, электр тогымен зақымдану көзі болжам бойынша «Алма домофон» ЖШС қызмет көрсететін домофон болған. Оқиға орнына тұрғын үй қатынастары бөлімі мен Техникалық басқару орталығының өкілдері барып, тексеру жүргізген. Қауіптің алдын алу мақсатында домофон электр желісінен ажыратылған.

Кейін әкімдік тоқ соғуға есік жақтауында орнатылған прожектор шамы себеп болуы мүмкін екенін хабарлады. Аталған құрылғы сөндіріліп, қауіп толық жойылған.