Таиланд астанасы Бангкокта үлкен апат тіркелді. 24 қыркүйек күні таңғы сағат 7-де Ваджира ауруханасының алдында жер кенеттен опырылып, көлемі шамамен 30×30 метр, ал тереңдігі 50 метрге жуық алып шұңқыр пайда болды. Бұл туралы жергілікті The Nation басылымы хабарлады.

Опырылу жаңа метро желісінің «Ваджира станциясы» құрылыс алаңының қасында болған. Жер астындағы бос кеңістіктің шөгуінен жол жабыны қирап, құлау аумағы барған сайын кеңейіп келеді. Апат салдарынан қасында орналасқан Самсен полиция бөлімшесінің ғимараты да зардап шекті.

Билік өкілдерінің айтуынша, қазірге дейін зардап шеккендер жоқ. Дегенмен қауіпсіздік мақсатында Ваджира ауруханасының науқастары мен қызметкерлері, сондай-ақ полиция қызметкерлері мен жақын маңдағы тұрғындар жедел эвакуацияланды.

Алдын ала жүргізілген тексеріс жолдың қатты шөгуі негізгі себеп болғанын көрсетіп отыр. Мамандар апат аймағын бақылап, жердің әрі қарай опырылу қаупін бағалауда.