Кәсіпқой боксшы Жәнібек Әлімханұлының рингке қашан оралатыны әзірге белгісіз. Спортшының менеджері Берік Сұлтан бұл мәселе тек ресми шешім жарияланғаннан кейін ғана нақты белгілі болатынын айтты.

Менеджер әлеуметтік желідегі жазбасында соңғы күндері тараған түрлі пікірлер мен сынға жауап берді. Оның айтуынша, Жәнібекке қатысты «мансабы аяқталды» деген әңгімелер шындыққа жанаспайды.

Берік Сұлтанның сөзінше, қазіргі уақытта боксшы ешқандай ресми түрде шеттетілген жоқ және чемпиондық мәртебесі сақталған. Алдағы қадамдар тиісті ұйымдардың ресми шешімінен кейін ғана қабылданады.

Сонымен қатар спортының менеджері команда рухының түспегенін, керісінше бұл жағдайдың оларды шыңдай түскенін атап өтті. Ол әлемдік бокста жасы үлкен спортшылардың да жоғары нәтиже көрсетіп жүргенін мысалға келтірді. Жәнібектің жасы небәрі 33-те екенін ескерсек, оның алда әлі үлкен мүмкіндіктері бар екенін айтты.

«Жарты жыл немесе бір жыл дисквалификация болса да, біз қайта ораламыз. “Qazaq Style” әлі талай рет рингте жарқырайды. Ең мықты кезең алда», – деді Берік Сұлтан.

Айта кетейік, бұған дейін ақпарат кеңістігінде Жәнібек Әлімханұлының кәсіпқой бокстан шеттетілгені жөнінде хабарлар тараған болатын. Алайда бұл мәлімет әзірге ресми түрде расталған жоқ.