Әлеуметтік желілерде Алматы қаласында әскерилердің қимылына байланысты әуе кеңістігі жабылып, әскери жағдай енгізілгені туралы ақпарат тарады. Алайда Қорғаныс министрлігі бұл мәліметтің шындыққа жанаспайтынын мәлімдеді.

Ведомствоның хабарлауынша, Алматының әуе кеңістігіне ешқандай шектеу қойылмаған. Әуе қозғалысы қалыпты режимде жүзеге асырылып жатыр.

— Әуе кеңістігін пайдалану Қазақстан Республикасының қолданыстағы заңнамасына сәйкес уәкілетті органдар арқылы реттеледі. Әлеуметтік желілерде тараған ақпарат жалған, — делінген Қорғаныс министрлігінің ресми мәлімдемесінде.

Айта кетейік, бұған дейін Алматы халықаралық әуежайы да әуе рейстеріне қатысты шектеулер енгізілмегенін хабарлаған болатын.