АҚШ президенті Дональд Трамп Мар-а-Лагодағы резиденциясында жаңа кластағы ауыр қаруланған әскери кемелердің құрылысы басталатынын мәлімдеді. Жиынға Қорғаныс министрі Пит Хегсет, Мемлекеттік хатшы Марко Рубио және Әскери-теңіз күштерінің хатшысы Джон Фелан қатысты.

Трамптың айтуынша, жаңа кемелер АҚШ тарихындағы ең ірі әскери кемелердің бірі болмақ. Олар ядролық қару, лазерлік жүйелер және гипердыбыстық зымырандармен жабдықталады. Аталған қарулардың бір бөлігі әлі де әзірлеу сатысында.

Алғашқы кезеңде екі кеме салынады. Кейін олардың саны 10-ға, одан әрі одан да көпке жетуі мүмкін. Жаңа кемелер класына «Трамп» атауы берілген.

Бұл кемелер қолданыстағы америкалық эсминецтер мен крейсерлерден ірі болады. Алайда су ығыстырғыштығы 30-40 мың тонна шамасында болып, 1990-жылдары қызметтен шығарылған «Айова» класындағы линкорлардан кіші болады.