Оңтүстік Кореяда сағатына 370 шақырым жылдамдықпен жүретін жаңа буындағы жоғары жылдамдықты пойыздың негізгі технологияларын әзірлеу кезеңі аяқталды. Жоба елдің теміржол саласындағы мүмкіндігін жаңа деңгейге шығаруға бағытталған. 

EMU-370 деп аталған электр пойызы сағатына 407 шақырымға дейін жылдамдығын арттыра алады. Бұл көрсеткіш оны әлемдегі ең озық теміржол жобаларының қатарына қосады.

Аталмыш жоба 2022 жылдың сәуір айынан бастап 2025 жылдың желтоқсанына дейін Корея теміржолын зерттеу институтының жетекшілігімен жүзеге асырылған. Көлік министрлігінің мәліметінше, жалпы 22,5 миллиард вон инвестиция салынған. Оның 18 миллиарды мемлекеттік бюджеттен, ал 4,5 миллиарды жеке сектор есебінен бөлінген.

Үкімет алғашқы пойыз үлгілерін келесі жылы шығаруды жоспарлап отыр. Ал толық ауқымды сынақ жұмыстары 2030 жылға белгіленген. Содан кейін қолданысқа беріледі.

Жоба сәтті болса, EMU-370 әлемдегі екінші ең жылдам жолаушылар пойызы атанбақ. Қазіргі таңда одан да жоғары жылдамдықтағы пойыз сағатына 400 шақырыммен сынақ режимінде жүріп жатыр.

Айта кетейік, Франция, Германия және Жапония секілді дамыған елдерде қолданыстағы жоғары жылдамдықты пойыздардың орташа жылдамдығы сағатына шамамен 320 шақырымды құрайды. Бұл Оңтүстік Кореяның жаңа жобасы жаһандық теміржол бәсекесінде маңызды орын алатынын көрсетеді.