Астанадағы Ұлттық әскери-патриоттық орталықта «Бас редакторлар клубы» қоғамдық бірлестігі мен Қазақстан Республикасының Қорғаныс министрлігі арасында стратегиялық ынтымақтастық туралы меморандумға қол қойылды. Құжат әскери тақырыпты кәсіби әрі жауапты түрде жариялауды жүйелеуге бағытталған.

Меморандумға Бас редакторлар клубының президенті, Сенат депутаты Бибігүл Жексенбай мен Қорғаныс министрінің тәрбие және идеологиялық жұмыс жөніндегі орынбасары, вице-адмирал Серік Бурамбаев қол қойды. Кездесуге республикалық және өңірлік БАҚ басшылары, министрліктің профильдік бөлімшелерінің өкілдері қатысты.

Бибігүл Жексенбай бұл келісім мемлекеттік орган мен медиа қауымдастық арасындағы сенімді нығайтатын маңызды қадам екенін атап өтті. Оның айтуынша, ашықтық пен қоғаммен адал диалогта бас редакторлардың жауапкершілігі ерекше.

Ал вице-адмирал Серік Бурамбаев әскерге қатысты қоғамда қалыптасқан кейбір көзқарастарды қайта қарау қажет екенін айтты. Ол Қарулы күштер қызметін бұрмаламай, нақты әрі кәсіби түрде жеткізудің маңызын атап өтті.

Меморандум аясында оқыту бағдарламалары, семинарлар, баспасөз турлары ұйымдастырылып, әскери тақырыптағы медиа материалдардың сапасын арттыру көзделіп отыр. Сондай-ақ салалық жобаларға бірлесіп қатысу жоспарланған.

Кездесуге қатысқан медиа өкілдері бұл құжат ақпараттық әріптестікті жаңа деңгейге көтеретініне сенім білдірді.