2026 жылдың 1 ақпанынан бастап Қазақстандағы балаларға қызмет көрсететін ұйымдарға қатысты мемлекеттік бақылаудың жаңа тәртібі күшіне енеді. Енді балабақша, мектеп-интернат, колледж жатақханасы секілді мемлекеттік бюджеттен қаржыландырылатын ұйымдарға күтпеген тексеріс жүргізуге құқықтық негіз беріледі.
Білім беру, тәрбиелеу, тамақтандыру, тұрғын үймен қамтамасыз ету немесе сауықтыру қызметін көрсететін мекемелер жоспардан тыс тексерілуі мүмкін. Мұндай бақылау қызмет басталғанға дейін де, оның орындалу барысы кезінде де жүргізіледі. Мақсат — балалардың қауіпсіздігіне тікелей әсер ететін заңбұзушылықтарды уақытында анықтау.
Министрліктің мәліметінше, жаңа тәртіп Қазақстан Республикасындағы баланың құқықтары туралы заң негізінде жүзеге асады және балаларға арналған қызмет сапасына қойылатын талаптарды күшейтеді.
Білім беру министрлігінің Балалардың құқықтарын қорғау комитетінің төрайымы Насымжан Оспанова жаңа жүйе мемлекеттік бақылаудың тиімділігін арттыратынын атап өтті.
«Күтпеген тексерістер балалардың қауіпсіздігін күшейтеді. Енді уәкілетті органға нақты сигнал түскен жағдайда, алдын ала жоспар жасамай-ақ объектіге шығуға мүмкіндік бар. Белгілі бір шағым не нақты дерек келіп түссе, мекеме міндетті түрде жоспардан тыс тексеріледі», — деді ол.
Айта кетейік, 4 желтоқсанда Мемлекет басшысы мәдениет, білім, отбасы және мемлекеттік бақылау мәселелерін қамтитын бірқатар заңдарға өзгерістер енгізу жөніндегі заңға қол қойған болатын. Соған сәйкес, 2026 жылдың 1 ақпанынан бастап балалар мекемелерін бақылау тәртібі «Халық денсаулығы туралы» кодекс пен «Баланың құқықтары туралы» заң аясында реттеледі. Бұған дейін бұл нормалар Кәсіпкерлік кодексінде қарастырылған еді.
DALAMEDIA admin
8
0