Бүгін Мәжіліс депутаттары Сенат енгізген түзетулермен келісе отырып, «Жасанды интеллект туралы» заңды толықтай қабылдады. Енді құжат Президенттің қол қоюына жіберіледі.

Бұған дейін Сенат заң жобасын Мәжіліске кері қайтарып, бірнеше маңызды өзгеріс ұсынған болатын.

Негізгі түзетулер:

• Енді жасанды интеллект жүйесін қолдану кезінде туындаған зиян үшін міндетті сақтандыру енгізіледі. Бұрын бұл тек ерікті түрде қарастырылған еді.

• Сондай-ақ, ЖИ иелері тек залалды азайтып қана қоймай, зиянның алдын алу және қауіптің болдырмау шараларын міндетті түрде қабылдауы тиіс.

Мәжілістің экономикалық реформа және өңірлік даму комитеті бұл өзгерістерді қолдап, заңды қабылдауды ұсынды. Депутаттар бірауыздан «иә» деп дауыс берді.

Әлем тәжірибесі:

• Еуропалық одақ - жасанды интеллектке қатысты толық заң қабылдаған алғашқы аймақтардың бірі.

• Оңтүстік Корея - ЖИ туралы арнайы заң қабылдады.

• Қытай, АҚШ, Ұлыбритания және БАӘ - өздерінің жеке ережелерін қолданады.

• Жапония, Бразилия және Үндістан - заң жобаларын әзірлеу үстінде.

Жаңа заң Қазақстанға жасанды интеллектті қауіпсіз әрі тиімді дамытуға құқықтық негіз береді.