Америкалық кәсіпкер Илон Маск “Википедияға” балама ретінде жаңа Grokipedia атты онлайн энциклопедиясын таныстырды. Қазіргі таңда сайтта шамамен 885 мыңнан астам мақала бар, ал жоба әлі де сынақ кезеңінде - 0.1 нұсқасында жұмыс істеп тұр.
Grokipedia.com сайты кеше қолжетімді болғанымен, кейбір қолданушылар алғашқы сағаттарда жүйедегі ақаулар туралы хабарлаған. Дегенмен, платформа бүгінде тұрақты жұмыс істеп тұр.
Масктың айтуынша, Grokipedia - “саяси бейтарап және ашық ақпарат көзіне” айналуды мақсат етеді. Ол бұған дейін “Википедияны” либералдық көзқарасты насихаттайды деп сынап, жазылушыларды бұл платформаны қаржыландыруды тоқтатуға шақырған болатын.
“1.0 нұсқасы қазіргісінен он есе жақсы болады. Бірақ тіпті бұл нұсқаның өзі Википедиядан асып түсті”, - деп жазды Маск өзінің Х (бұрынғы Twitter) желісіндегі парақшасында.
Ал “Википедияның” негізін қалаушылардың бірі Джимми Уэйлс Washington Post басылымына берген сұхбатында Grokipedia-ға үлкен үміт артпайтынын айтты.
Оның сөзінше, “жасанды интеллект мәтінді өңдеуде әлі жетілмеген, сондықтан қателер көп болуы мүмкін”.
Айта кетсек, Масктың xAI компаниясы жасаған Grok чат-боты бұған дейін бірнеше даулы жағдайға тап болған. Ол кей сұрақтарға жауап беру кезінде “ақ нәсілділерге қарсы геноцид” секілді жалған конспирологиялық теорияларды таратқаны үшін сынға ұшыраған еді.
Илон Маск пен X компаниясы бұл қателіктердің түзетілетінін мәлімдеді. Миллиардер бұған дейін xAI командасы Grokipedia жобасын әзірлеп жатқанын хабарлаған болатын.
DALAMEDIA admin
9
0