Елімізде мектеп қабырғасындағы буллинг мәселесі әлі де өткір күйінде қалып отыр. Өткен жылы 1800-ден астам оқушы қатарластарынан немесе мұғалімдер тарапынан қысым көргенін айтып, шағым түсірген. Олар арыздарын Бас прокуратураның Telegram-чат-боты мен оқу орындарына орнатылған арнайы QR-кодтар арқылы жолдаған.

Тексерістер нәтижесінде шамамен 200 адам жауапкершілікке тартылды.

Денсаулық сақтау министрлігінің дерегіне сүйенсек, қазақстандық оқушылардың шамамен 20 пайызы ара-тұра буллингтің құрбанына айналады. Әсіресе 11 бен 15 жас аралығындағы балалар жиі зардап шегеді. Сауалнамаға қатысқан 500-ден астам оқушы айына екі-үш рет мазақтауға немесе қорқытуға ұшырайтынын мойындаған.