Қазақстанда жасанды интеллектке маманданған зерттеу университеті құрылуы ықтимал. Бұл бастаманы Мемлекет басшысы Қасым-Жомарт Тоқаев Астанада өткен ЖИ дамыту жөніндегі кеңесте көтерді.

Президенттің айтуынша, бүгінде елімізде нақты осы салаға бағытталған жоғары оқу орны жоқ. Ал көптеген мемлекеттерде мұндай тәжірибе әлдеқашан іске асқан. Мәселен, Біріккен Араб Әмірліктерінде Мұхаммед бин Зайд атындағы жасанды интеллект университеті жұмыс істейді.

Мемлекет басшысы жаңа оқу орнына арнайы мәртебе беріп, оның жұмысына әлемнің жетекші университеттерін тарту қажеттігін атап өтті. Үкіметке биылдың соңына дейін нақты ұсыныстар әзірлеу тапсырылды.

Білім министрлігінің дерегінше, қазір еліміздегі 79 университетте IT бағытында 63 мыңнан астам студент оқиды. Оқу бағдарламаларына жасанды интеллект пәні енгізілген, ғылыми орталықтар жұмыс істейді. 2024 жылы отандық ғалымдар KAZ-LLM атты тілдік моделін таныстырған болатын. Алайда Президенттің пікірінше, бұл қадамдар еліміздің цифрландырудағы биік мақсаттарына әлі жеткіліксіз.