Астанада «ҚТЖ – Жүк тасымалы» компаниясына ірі көлемде айыппұл салынды. Сот олардың монополиялық жағдайын пайдаланып, өздеріне тиесілі компанияларға артықшылық бергенін анықтады.

Не болды?
Қазақстан мен Қырғызстанның экспедиторлар қауымдастықтары және бірнеше жекеменшік логистикалық компаниялар шағым түсірген. Тергеу барысында белгілі болғандай, «ҚТЖ – Жүк тасымалы» жүк тасымалдау жоспарын келісу кезінде өзімен байланысты «KTZ Express» пен «КедентрансСервиске» жол берген. Ал жеке компанияларға түрлі кедергілер жасаған.

Сот шешімі қандай?
2025 жылғы 22 тамызда Астананың мамандандырылған ауданаралық соты компанияны кінәлі деп танып, 1 миллиард 420 миллион теңге айыппұл салды. Компания бұл шешіммен келіспей, апелляцияға жүгінген. Алайда 15 қыркүйекте Астана қалалық соты алғашқы шешімді күшінде қалдырды.

Бұған дейін не болған?
Агенттік бұған дейін де «ҚТЖ – Жүк тасымалының» заңсыз әрекеттерін анықтаған. Компания HILL Corporation ЖШС-мен 12 млрд теңгенің келісімшартын арнайы жағдай жасап, басқаларға мүмкіндік бермей бекіткен. Бұл іс бойынша да сот Бәсекелестікті қорғау агенттігінің шешімін заңды деп тапты.