Франция Ұлттық жиналысы премьер-министр Франсуа Байру кабинетін отставкаға жіберу туралы шешім қабылдады. Үкіметке сенімсіздік вотумын 364 депутат қолдап, қажетті 288 дауыстан асып түсті.

Байру кабинеті бір жылдан аз уақыт жұмыс істеді. Оның құлауына 2026 жылғы бюджет жобасы себеп болды. Премьер өсіп бара жатқан мемлекеттік қарызды (ІЖӨ-нің 114%-ы) тежеу үшін салықтарды, әлеуметтік төлемдер мен зейнетақыларды уақытша «қатыруды» ұсынған еді. Бұл жоспарға «Жаңа халықтық фронт» солшылдары да, «Ұлттық бірлестік» ультраоңшылдары да қарсы шықты.

Нәтижесінде Франция тағы да саяси тығырыққа тірелді: парламентте ешбір күш басымдыққа ие емес. Ендігі қадамды президент Эммануэль Макрон жасамақ — ол жаңа премьерді тағайындай алады немесе мерзімінен бұрын сайлау жариялау құқығына ие.

Саяси дағдарыс аясында билік беделі айтарлықтай әлсіреп отыр: Макрон рейтингі 15%-ға дейін құлдыраса, ультраоңшылдардың ықпалы күшейе түсті. Марин Ле Пен тіпті «билікті қолға алуға дайынмын» деп мәлімдеді.