Израиль мен ХАМАС Газадағы соғысты тоқтатуға бағытталған Дональд Трамптың бейбіт жоспарының алғашқы кезеңі туралы келісімге қол қойды. Бұл туралы АҚШ президенті өз жазбасында Truth Social желісінде хабарлады.
Трамптың айтуынша, келісімнің басты тармақтары — соғыс қимылдарын дереу тоқтату, барлық тұтқындарды босату және Израиль әскерін Газа секторынан ішінара шығару. Өз кезегінде Израиль бірнеше жүздеген палестиналық тұтқынды босатуға міндеттенді.
«Бұл — араб және мұсылман әлемі, Израиль, көршілес елдер мен АҚШ үшін тарихи күн. Барлық тұтқындар алдағы күндері босатылады, ал Израиль әскері келісілген шекараға дейін шегінеді. Бұл — тұрақты бейбітшілікке апарар алғашқы қадам», — деді Дональд Трамп.
Сондай-ақ ол келісімнің жүзеге асуына Катар, Мысыр және Түркия елдерінің делдал ретінде қатысқанын атап өтіп, оларға алғыс айтты. Жоспардың екінші кезеңі Газа секторын қалпына келтіруді және уақытша басқару органы — «Бейбітшілік кеңесін» құруды көздейді.
Израиль премьер-министрі Биньямин Нетаньяху бұл келісімді «ұлттық және моральдық жеңіс» деп атап, Трампқа көрсеткен қолдауы үшін алғыс білдірді.
«Біздің тұтқындар түгел оралмайынша, тынышталмаймыз», — деді ол.
Өз кезегінде ХАМАС өкілдері тірі қалған барлық тұтқындарды босатып, қаза тапқандардың денелерін қайтаруға дайын екенін мәлімдеді. Алайда, бұл шарт Израильдің келісімді толық орындауына — яғни, әуе соққыларын тоқтатып, әскерін шығара бастауына байланысты.
Дегенмен, келісім жарияланғанына қарамастан, Газа секторында жарылыстар мен әуе соққылары жалғасуда. Анклавтың азаматтық қорғаныс қызметі Газа қаласы мен оның солтүстігінде жаңа шабуылдар тіркелгенін хабарлады.
Газадағы қарулы қақтығыс 2023 жылдың 7 қазанында ХАМАС ұйымының Израильге жасаған шабуылынан басталған еді. Сол күні мыңнан астам адам қаза тауып, ондаған бейбіт тұрғын тұтқынға алынған. Бұған жауап ретінде Израиль ауқымды әскери операция мен блокада бастады. Палестина билігінің дерегінше, соғыс басталғалы бері 67 мыңнан астам адам қаза тапқан, олардың басым бөлігі — әйелдер мен балалар.
DALAMEDIA admin
10
0