11 қазанда Қостанай - Астана бағытындағы Qazaq Air әуе рейсінде болған оқиғадан кейін компанияның бір топ ұшқышы басшылыққа еңбекақыны қайта қарауға қатысты талаптарын жолдады. Бұл туралы Қазақстан Республикасы Көлік министрлігі хабарлады.

Пилоттар ұсынған талаптардың ішінде түнгі рейстерге төлем мөлшерін арттыру, командирлер мен екінші пилоттардың жалақысын көтеру, сондай-ақ ұшу сағаттарына төленетін ставканы көбейту бар.

Министрлік мәліметінше, Qazaq Air басшылығына бұл өтінішті қолданыстағы еңбек заңнамасына сәйкес қарастыру тапсырылған.

Айта кеиейік, 11 қазан күні Қостанай - Астана бағытында ұшуға дайындалған Qazaq Air әуе кемесінің шасси бөлігіне өрт тұтанған. Экипаж ұшуды дереу тоқтатып, ұшақ тұраққа қайтарылған. Оқиға кезінде ешкім зардап шеккен жоқ.

Ақауды жою үшін Қостанайға техникалық мамандар жіберілді. Ал жолаушыларға қонақүйге орналастыру, билет ақысын қайтару немесе басқа рейске ауыстыру мүмкіндігі ұсынылған.

Көлік министрлігі оқиға бойынша арнайы комиссия құрылып, техникалық тексеріс басталғанын мәлімдеді.