WBO және IBF нұсқалары бойынша әлем чемпионы Жәнібек Әлімханұлының айналасындағы жағдайға бокс жанкүйерлерін алаңдаулы. Еске сала кетейік, 6 желтоқсанға жоспарланған Эрисланди Ларамен АҚШ-тағы жекпе-жек допингке қатысты күдікке байланысты өтпей қалған еді.
VADA ұйымы сынамадан мельдоний табылғанын хабарлағаннан кейін айқас кейінге шегерілді. Осыдан соң боксшының менеджері Берік Сұлтан алғаш рет ресми түсініктеме берді.
Оның айтуынша, бұл жағдай команда үшін де күтпеген жайт болған. Алғашқы алынған қан мен зәр сынамалары таза шыққан. Кейін қайта тапсырылған тек зәр сынамасы бойынша сұрақ туындаған.
«Біз тамақтану рационын да, витаминдерді де өзгерткен жоқпыз. Барлығы рұқсат етілген қоспалар. Оларды тексеріске де бердік, бәрі таза. Сондықтан бұл жағдайдың қалай болғанын өзіміз де түсіне алмай отырмыз», – деді менеджер.
Сондай-ақ, Берік Сұлтан команда таза спорт қағидатынан айнымайтынын, Жәнібектің де кінәсіз екеніне сенетінін атап өтті. Оның айтуынша, В сынамасының нәтижесі бәрін анықтайды.
«Екінші сынама біздің таза екенімізді дәлелдейді деп үміттенеміз. Сол кезде мансабымызды жалғастырып, чемпиондық белбеулерді сақтаймыз», – деді ол
Менеджер В сынамасы да оң нәтиже көрсеткен жағдайда да команда күресті тоқтатпайтынын айтты. Қазіргі таңда Жәнібек Әлімханұлы Қазақстанға оралған. В сынамасы 8 қаңтар күні ашылады. Боксшының алдағы тағдыры дәл осы нәтижеге байланысты шешілмек.
DALAMEDIA admin
8
0