Атырау облысында із-түзсіз кеткен отбасыға қатысты тергеу әлі тоқтаған жоқ. 25 желтоқсанда полицияға Жангелдин ауылының тұрғындары жоғалғаны жөнінде арыз түскен.

Құқық қорғау органдары Наурыз бен Мирамгүлді бірнеше күннен бері іздестіріп жатыр. Тергеу аясында Геолог ықшамауданында тексеріс күшейтілді. Бұл аумақта полиция мен Ұлттық ұланның күші жұмылдырылып, жылжымалы штаб жұмыс істеуде.

«Ақ Жайық» басылымының мәліметінше, күдікті Сұлтан Сарсемалиев жұбайымен бірге осы маңнан уақытша үй жалдап тұрған. Тергеушілер үйдің ішін, аула мен айналаны толық тексерген. Бұған дейін жер қазу жұмыстары жүргізіліп, арнайы георадар қолданылған.

Аудан бейнебақылау камераларымен толық қамтылмаған, ал қолда бар жазбалардың сақталу мерзімі қысқа. Бұл жағдай тергеуге белгілі бір қиындықтар туғызуда. Көршілердің айтуынша, күмәнді жайттар байқалмаған, отбасы тұйық өмір сүрген.

Ресми дерекке сәйкес, 6 қаңтарда ерлі-зайыптының мәйіті табылған. Олардың ұл-қызы әлі іздестіріліп жатыр. Аталған дерек бойынша адам өлтіру белгілерімен қылмыстық іс қозғалып, 29 жастағы күдіктіге іздеу жарияланған. Тергеу амалдары жалғасуда.