Ақтау қаласында құбырдың жарылуына байланысты бірнеше шағынауданда ауыз су беру уақытша шектелді. Апат салдарынан тұрғындар сусыз қалды.

«Каспий жылу, су арнасы» мемлекеттік коммуналдық кәсіпорнының мәліметінше, қала аумағында ауыз су жартылай өшірілген. Сумен қамтуда іркіліс тіркелген аумақтардың қатарында бірқатар тұрғын үйлер мен әлеуметтік нысандар бар.

Атап айтқанда, 27-шағынаудандағы №2, 44, 45, 53, 54, 57, 71, 72, 74, 75 және 76 ғимараттар, 16-шағынаудандағы «Айсар» тұрғын үй кешені, №18 үй, «Бек» мейрамханасы, бизнес орталық пен монша, сондай-ақ 3B-шағынаудандағы энергетикалық колледж бен оқу орталығы зардап шеккен. Бұдан бөлек, 4-шағынаудандағы №1, 2, 3, 20, 21, 67 үйлер, №5 мектеп пен №67А ғимаратта да су беру тоқтатылған.

Ал 1-ден 8-ге дейінгі, сондай-ақ 14 және 15-ші шағынаудандарда ауыз су қысымы төмендетілгені хабарланды.

Коммуналдық кәсіпорын өкілдерінің айтуынша, апатты жою жұмыстары жүргізіліп жатыр. Жөндеу қашан аяқталып, су толық берілетіні туралы ақпарат қосымша жарияланбақ.

Айта кетейік, бұған дейін елімізде ауыз суға есептегіш құрал орнатпаған тұрғындар суды екі есе тарифпен төлейтіні жөнінде хабарланған болатын.