Астанадағы City Transportation Systems (CTS) компаниясы қала аумағындағы жер телімдері мен ғимараттарды, сондай-ақ аяқталмаған нысандарды аукционға шығарды. Саудадан түскен қаражат жеңіл рельсті транспорт (LRT) жобасын аяқтауға бағытталмақ.

Аукциондар e-qazyna.kz платформасында өтіп жатыр. Мәселен, бүгін, 9 қыркүйекте, Нұра ауданындағы бір жер телімі 338 миллион теңгеге жуық бастапқы бағамен сатылымға қойылады. Бөкейхан көшесінде орналасқан Birlik House тұрғын үй кешенінің құрылыссыз қалған нысаны да саудаға түседі. Оның бастапқы құны – 3,2 миллиард теңгеден асады.

CTS өкілдерінің айтуынша, бұл нысандар компания меншігіне берешекті өндіріп алу тетігі арқылы өткен. Егер оларды алғашқы аукционда сату мүмкін болмаса, кейін қайтадан саудаға шығарылады.