Атырау облысы Қызылқоға ауданындағы Былқылдақты елді мекенінде ауыз суға арналған жоба іске аспай, қыруар қаржының нәтижесі көрінбей отыр. Облыстық бюджеттен бөлінген 209 млн теңгеге 2023 жылы 10 шақырым су құбыры тартылғанымен, ауыл халқы бұл суды тұтынбайды.
Тұрғындардың айтуынша, құбыр арқылы келген су ащы әрі тұрмыстық қажетке жарамсыз. Тіпті төрт түлік те ішпейді.
– Су тұщы болып, әр үйге қосылса жақсы еді. Қазір су келіп тұр, бірақ пайдаланып отырған жоқпыз. Амалсыз үй жанындағы құдықтан су алып отырмыз, – дейді ауыл тұрғыны Қуандық Елемесұлы.
Жоба аясында салынған су тұщытатын қондырғы да бүгінде қараусыз қалған. Ал ауыл маңында бұрыннан тұщы суы бар бұлақтар мен жеке құдықтардың бар екені тұрғындардың наразылығын күшейтіп отыр. Олардың сөзінше, бұл табиғи су көздері жоба кезінде ескерілмеген.
Жауапты органдардың мәліметінше, құрылыс жүргізген мердігер мекеме банкрот деп танылып, жоба толық аяқталмай қалған. Сағыз ауылдық округінің әкімі Асхат Арыстановтың айтуынша, аталған нысан бұрын бекітілген жоба негізінде салынған.
– Бұл бізге дейін жасалған жоба. Қазір су тұщытатын станция мен құбырды «Сағыз су» мекемесіне сенімгерлік басқаруға беру көзделіп отыр. Келер жылдан бастап жұмысты қайта жандандыру жоспарымызда бар, – деді округ әкімі.
Айта кетейік, Былқылдақты ауылында шамамен 60 адам тұрады. Ауыл халқы қомақты қаржыға салынған жүйе нақты нәтиже беріп, таза ауыз суға қол жеткізетін күнді күтуде.
DALAMEDIA admin
5
0