Алматыда қоқыс контейнерлерін металдан жерге батып тұратын пластик контейнерлерге ауыстыру жобасы бюджетке 6 миллиард теңгеден астам шығын әкелуі мүмкін. Бірақ, тұрғындар тазалықтың жақсарғанына күмәнданып, жобаға қатысты ашық ақпараттың жоқтығына наразылық білдіруде.

 2025 жылдың ортасында басталған науқан басынан-ақ сынға ұшырады. Жұмыстар кешігіп жүргізіліп, қала аумағында ұзақ уақыт қазылған шұңқырлар қалды. Ал, аяқталу мерзімі бірнеше рет өзгеріп, жобаның өзі қараша айына қарай ғана ішінара іске асқан. Орнатылған жаңа контейнерлердің қоқыс салатын аузы тар болып, тұрғындардың қолайсыздығын туғызғаны да айтылуда.

 Сондай-ақ, тұрғындардың сөзінше, кейбір аулаларда тазалық жағдайы бұрынғыдан да нашарлаған. Бұл мәселеге қатысты билік өкілдері нақты түсіндірме берген жоқ. Контейнерлердің үлгісі қалай таңдалды, жеткізуші кім, балама нұсқалар қарастырылды ма деген сұрақтар жауапсыз қалуда.

Ашық деректерге сүйенсек, контейнерлердің өзіне кемінде 2,3–2,7 млрд теңге жұмсалуы мүмкін. Бұдан бөлек, контейнер алаңдарын салуға 3,2 млрд теңге бөлінген. Осылайша, жобаға кеткен жалпы шығын 5,5–6 млрд теңгеге жуықтайды. Бұған қоқыс таситын жаңа техникаларды сатып алу шығындары кірмейді.

Нәтижесінде, Алматыда қымбат жоба іске асқанымен, оның тиімділігі мен қаланың санитарлық жағдайына нақты әсері әзірге ашық күйінде қалып отыр.