Атырау қаласының Балықшы шағын ауданында болған ауыр қылмысқа қатысты сот үкімі шықты. 41 жастағы ер адам әйелін екі қызының көз алдында соққыға жығып, өлтіргені үшін 10 жылға бас бостандығынан айырылды.

Сот материалдарына сәйкес, қайғылы жағдай тамыз айында болған. Айыпталушы сол күні алкогольдік ішімдік ішіп, мас күйінде үйіне келген. Қызғаныштан әйелінің ұялы телефонын тексеріп, ерлі-зайыптылар арасында жанжал туындаған. Кикілжіңнен кейін әйел басқа бөлмеге кетіп, ұйықтап қалған.

Алайда біраз уақыттан соң ер адам ас бөлмеден қамыр жаятын оқтауды алып, әйел жатқан бөлмеге кірген. Ол оқтаумен әйелін бірнеше рет басынан ұрған. Ауыр соққы салдарынан жәбірленуші сол жерде тіл тартпай кеткен.

Қылмыстық іс Атырау облысының қылмыстық істер жөніндегі мамандандырылған ауданаралық сотында қаралды. Сот айыпталушыны адам өлтіру бабы бойынша кінәлі деп танып, жазасын жалпы режимдегі түзеу мекемесінде өтеу туралы шешім шығарды.

Қайғылы сәтте пәтерде ерлі-зайыптылардың 6 және 12 жастағы қыздары болған. Үлкен қызы анасының өлімін өз көзімен көрген. Кейін балаға психологиялық көмек көрсетіліп, кәмелетке толмағандарды бейімдеу орталығының мамандары жұмыс жүргізген.

Балалардың әжесі көзі нашар көретіндіктен немерелерін өз қамқорлығына ала алмады.

Тергеу барысында тағы бір жайт белгілі болды. Айыпталушы әйелінің қайтыс болғанын түсінсе де, бірден жедел жәрдем мен полицияға хабарласпай, екі қарындасын шақырған. Тек кейін олардың бірі жедел қызметтерге қоңырау шалған.

Сот отырысында ер адам өз кінәсін толық мойындап, жасаған ісіне өкініш білдірді. Ол марқұмның туыстарынан және екі қызынан кешірім сұрады.